Yazın gəlişi ilə çoxlarının səbirsizliklə gözlədiyi meyvələrdən biri də çiyələkdir. Lakin onun mövsümünü gözləməyib süni şəraitdə yetişdirilənini istehlak edənlər az deyil. Bu isə sağlamlıqla bağlı bir çox təhlükələrə yol aça bilər.

Aztibb.az xəbər verir ki, hazırda bazarlarda təklif olunan çiyələklər istixana şəraitində yetişdirilir və zərərvericilərdən qorunması üçün pestisidlərdən, hormonlu gübrələrdən istifadə olunur. Belə meyvələrə isə daha çox hamilə və süd verən qadınlar, uşaqlar meyil edir. Bu da onların sağlamlığını böyük risk altına atır. Dərmanlı, süni yetişdirilmiş çiyələk mədə-bağırsaq sisteminin, bağırsaq mikroflorasının pozulmasına, zəhərlənməyə, allergik reaksiyalara, uzunmüddətli istifadə zamanı isə hətta qaraciyər funksiyasının pozulmasına da səbəb olur.

Ekspertlər bildirirlər ki, çiyələk alarkən təbii görünüşlü, orta ölçülü, solğun olanları seçmək lazımdır. Əgər çiyələk çox iridirsə, parlaqdırsa, qoxusu hiss olunmursa, hamısı eyni formadadırsa, bu, onların süni şəkildə yetişdirildiyinin göstəricisidir. Həmçinin yeməmişdən əvvəl adi suda 10 dəqiqə saxlamaq lazımdır. Süni yetişdirilən çiyələyi isə suya bir qədər duz və yaxud da az miqdarda sirkə əlavə edərək yumaq tövsiyə olunur. Bu, onun tərkibində olan pestisid qalığını müəyyən qədər azaldır.