TƏBİB əməkdaşları Heydər Əliyev Fondunun təşəbbüsü ilə keçirilən “Bakı Marafonu 2025”də iştirak ediblər.
TƏBİB-dən Aztibb.az-a bildirilib ki, “Küləyə qalib gəl” şüarı ilə 8-ci dəfə təşkil olunan marafonda iştirakçılar 21 km-lik məsafə qət ediblər.
Eyni zamanda, TƏBİB marafon boyunca tibbi xidmətlərin təşkilini təmin edib.
Respublika Təcili və Təxirəsalınmaz Tibbi Yardım Mərkəzinin briqadaları Dövlət Bayrağı Meydanının, Su İdmanı Sarayının, “Dəniz Mall” ticarət mərkəzinin, Bakı Dəniz Vağzalının, “Sahil” metrostansiyasının, Ağ şəhər dairəsinin yaxınlığına təhkim olunublar. Ümumilikdə 1-i ehtiyat olmaqla, 8 briqada cəlb olunub.
2016-cı ildən təşkil olunan Bakı marafonu idmanın inkişafına dəstək göstərmək, sağlam həyat tərzini təbliğ etmək məqsədi daşıyır.
