Milli Aviasiya Akademiyasında “Mən burdayam” mövzusunda autizmli uşaqlar üçün festival keçirilib.

Aztibb.az-a Akademiyadan bildirilib ki, festivalda İDDO Psixi Sağlamlıq Proqramı ilə yanaşı, Tibbi Ərazi Bölmələrini İdarəetmə Birliyi (TƏBİB), Tibbi Sığorta, Azərbaycan Həmkarlar İttifaqları Konfederasiyası, Yeni Klinika və digər təşkilatlar iştirak edib.

Açılış mərasimində çıxış edən İDDO Psixi Sağlamlıq Proqramının direktoru Jalə Əhmədova bildirib ki, festivalın məqsədi autizmli uşaqların vaxtlarının səmərəli keçirilməsi və onların cəmiyyətə inteqrasiyalarını sürətləndirilməsindən ibarətdir. Proqram çərçivəsində autizmli uşaqların təhsili, məşğulluğu və istedadlarının üzə çıxarılması məsələləri daim diqqət mərkəzindədir.

Artıq 3 ildir ardıcıl olaraq keçirilən festival ənənəyə çevrilib və autizmli uşaqlar üçün daha əhatəli tədbirlərin keçirilməsi nəzərdə tutulub. Qonaq qismində çıxış edən Ailə, Qadın və Uşaq Problemləri üzrə Dövlət komitəsinin sədr müavini Sədaqət Qəhrəmanova İDDO Psixi Sağlamlıq Proqramının əhəmiyyətindən danışıb.

Tədbir konsert proqramı ilə davam edib. Autizmli uşaqlar mahnı və rəqslərlə çıxış ediblər. Tədbir iştirakçıları autizmli uşaqların əl işlərindən ibarət sərgiyə baxıblar.

Sonra Milli Aviasiya Akademiyasının rektorunun köməkçisi, dosent Gülnarə Əhmədovaya və digər qurumların rəhbərlərinə autizmli uşaqların cəmiyyətə inteqrasiyasında fəal iştiraklarına görə Fəxri Fərmanlar təqdim olunub.