Türkiyənin Antalya şəhərində Türk Toraks Dərnəyinin təşkilatçılığı ilə ağciyər xəstəlikləri üzrə beynəlxalq konqres keçirilib. 

Konqresdə ölkəmizi ATU-nun Ağciyər xəstəlikləri kafedrasının müdiri Rafiq Bayramov təmsil edib.

ATU-dan Aztibb.az-a bildirilib ki, o,  ağciyər vərəmi işçi qrupunun “Klinik təcrübədə vərəmin müalicəsi, müşahidəsi və yan təsirlər” toplantısında moderator və müzakirəçi kimi iştirak edərək, müxtəlif ölkələrdən olan mütəxəssislərlə fikir mübadiləsi aparıb. 

Avropa Respiratorlar Cəmiyyəti, Amerika Torokal Cəmiyyəti və s. beynəlxalq təşkilatların rəhbərlərinin qatıldığı konqresdə hava çirklənməsi və tütünçəkmənin tənəffüs orqanlarına zərərli təsiri, bronxial astma, ağciyər vərəmi, interstisial ağciyər xəstəlikləri, ağciyərlərin xronik obstruktiv xəstəliyi və digər ağciyər patologiyalarının diaqnostika və müalicəsinə müasir yanaşmalara həsr olunmuş məruzələr dinlənilib..