Almaniyanın Bayroyt Universitetinin alimləri neft emalının yan məhsulu olan kükürddən istifadə edərək plastikin ekoloji təmizliyini artırmağın yeni üsulunu tapıblar. Onların işləyib hazırladığı texnologiya poliefirlərdə – butulkalar, qablaşdırma, bel çantaları və geyim hazırlanmasında istifadə olunan plastik növündə xüsusi “dinamik kükürd əlaqələri” yaratmağa imkan verir.

Aztibb.az-ın www.lifetechnology.com-a istinadla xəbərinə görə, yeni plastiki modifikasiya etmək, yəni istiləşdikdə turşunun təsiri altında dağılan çoxdəfəli yapışqana çevirmək mümkündür. Bu isə, daha davamlı və istifadədə çevik materialların yaradılmasına yol açır.

Tədqiqatın nəticələri “Angewandte Chemie International Edition” jurnalında dərc edilib.

Metod təkcə effektiv deyil, həm də iqtisadi cəhətdən sərfəlidir: reaksiya sadə katalizator – litium alkoksid istifadə etməklə mülayim temperaturda baş verir ki, bu da xərcləri və enerji istehlakını azaldır.

“Bizim kəşfimizin xüsusiyyəti ondan ibarətdir ki, kükürd təkcə dinamik əlaqələrin yaradılmasında iştirak etmir, həm də reaksiyanı özü sürətləndirir. Bu, yetərincə qeyri-adi mexanizmdir”, – deyə tədqiqatın başçısı professor Aleks Player bildirib.