TƏBİB regionda fəaliyyət göstərən tibb müəssisələrini də müasir cərrahiyyə texnologiya və avadanlıqları ilə təmin etməyə davam edir. Maddi-texniki bazanının gücləndirilməsi region səhiyyəsinin inkişafına, əhalinin vaxtında və məsafə qət etmədən keyfiyyətli tibbi xidmət almasına hesablanıb.

 

Həyata keçirilən zəruri təminat sayəsində Qobustan Rayon Mərkəzi Xəstəxanasında ilk dəfə olaraq laparoskopik üsulla xolesistektomiya (öd kisəsi) əməliyyatlarına start verilib.

 

Aztibb.az TƏBİB-in feysbuk səhifəsinə istinadla bildirir ki, tibb müəssisəsində bu cür əməliyyatlar 5 həkim-cərrah tərəfindən icra olunur.

 

Xəstəxanaya kəskin daşlı xolesistit diaqnozu ilə müraciət edən 42 yaşlı pasiyent üzərində laparoskopik xolesistektomiya əməliyyatı uğurla icra olunub. Hazırda pasiyentin stasionar şəraitdə müalicəsi davam edir.

 

Əməliyyatlar müasir tibbin tələblərinə uyğun minimal invaziv metodlarla aparılır. Məlumat üçün bildirək ki, bu cür müdaxilələr zamanı daha az ağrı hissi olur, həmçinin qısa müddətdə sağalma və sürətli reabilitasiya imkanı yaradır.

 

Qeyd edək ki, əməliyyat İcbari Tibbi Sığorta üzrə Dövlət Agentliyinin Xidmətlər Zərfi çərçivəsində həyata keçirilib.