Finlandiyalı elm adamları qeyri-sağlam qida və içkilərin gənclərdə bioloji qocalmanı sürətləndirdiyini müəyyən ediblər.

Aztibb.az xəbər verir ki, "Clinical Nutrition" (CliNut) elmi jurnalında dərc olunan araşdırmanın nəticələri göstərib ki, bioloji yaş orqanizmin vəziyyətini hüceyrə səviyyəsində əks etdirir və xronoloji yaşdan fərqlənir.

Alimlər bioloji yaşı ölçmək üçün epigenetik saatlardan (DNT metilasiyasını təhlil edən modellər) istifadə ediblər. Tədqiqata 20-25 yaş arası 826 əkiz cəlb olunub. İştirakçılar 55 qida məhsulunun istehlak tezliyini göstərən anketləri doldurublar. Tədqiqatçılar fiziki fəaliyyət, siqaret və bədən çəkisi kimi digər həyat tərzi faktorlarını da nəzərə alıblar. Nəticələr göstərib ki, meyvə və tərəvəzləri az, qırmızı və emal olunmuş ət, "fastfood" qidalar, şəkərli içkilərdən isə çox istifadə edənlər bioloji qocalma ilə qarşılaşırlar. Bunun əksinə olaraq, sağlam pəhrizlə qidalanan iştirakçılar daha yavaş qocalmağa meyillidirlər. Tədqiqatda, həmçinin müəyyən edilib ki, genetika, pəhriz və yaşlanma arasındakı əlaqə də mühüm rol oynayır. Lakin alimlərin fikrincə, insanlarda genetik meyil olsa belə, düzgün pəhriz qocalma prosesini ləngidir.