Qida mütəxəssisləri ən sağlam və zərərsiz tərəvəzlərdən biri kimi tanıdığımız xiyarın gizli təhlükələrini açıqlayıblar. Tərkibi bol miqdarda su, B qrup vitaminləri, kalium və maqnezium kimi mikroelementlərlə zəngin olan bu tərəvəzin həddindən çox istehlakı əks təsirlərə səbəb ola bilər.

Aztibb.az xəbər verir ki, mütəxəssislər onu gündəlik rasiona daxil edərkən diqqətli olmağı tövsiyə edirlər.

İlk növbədə diqqət yetirilməli olan əsas məqam tərəvəzin günün hansı saatlarında yeyilməsidir. Mütəxəssislər onu günün birinci yarısı və ya nahar vaxtı istehlak etməyi məsləhət görürlər. Belə ki, xiyar yüngül qida kimi görünsə də, onun tərkibində lif var, bu da mədə-bağırsaq traktında uzun müddət emal tələb edir. Nəticədə həzm gecikir və gecə istirahət əvəzinə, orqanizm aktiv şəkildə işləyir. Xiyarın toxumlarında sidikqovucu təsirə malik cucurbitin maddəsi olduğu üçün həzmsizlik və ya qıcıqlanan bağırsaq sindromundan əziyyət çəkən insanlarda şişkinliyə səbəb olur. Yüksək təzyiqli insanların da diqqətli olması tövsiyə edilir. Tərəvəzin həddindən artıq qəbulu, həmçinin ürək, əzələ və sinir sisteminin fəaliyyətini poza bilər.