Futszyan Tibb Universitetinin (ÇXR) mütəxəssisləri müəyyən ediblər ki, qısa və qeyri-sabit yuxu piylənmə riskini əhəmiyyətli dərəcədə artıra bilər.

Aztibb.az xəbər verir ki, tədqiqatın nəticələri “BMC Public Health” jurnalında dərc edilib.

Alimlər orta yaşı 50,5 olan 4 540 könüllünün sağlamlıq məlumatlarını təhlil ediblər. Tədqiqatçılar ABŞ-nin Milli Sağlamlıq və Qidalanma Müayinəsinin materiallarından istifadə ediblər. Elmi iş çərçivəsində yuxunun müddəti, gündüz yuxululuğu və yuxuya getmə problemlərinin mövcudluğu qiymətləndirilib. Bu məlumatlar əsasında iştirakçılar üç qrupa bölünüb: sağlam, aralıq və qeyri-sağlam yuxu rejimi olanlar.

Məlum olub ki, pis yuxu rejimi olan insanlarda piylənmə ehtimalı keyfiyyətli dincələnlərə nisbətən 41 % daha yüksəkdir. Bu təsir cins, yaş, təhsil səviyyəsi və digər amillərdən asılı olmayaraq qalırdı. Bununla yanaşı, piylənmə riski təkcə gecə yuxusunun çatışmazlığında deyil, həm də qeyri-müntəzəm qrafiki və gec yatmaq vərdişi olan insanlarda da artırdı.

Alimlər xatırladırlar ki, yuxu və oyaqlıq dövrəsi maddələr mübadiləsinə birbaşa təsir göstərir. Sirkad ritmlərinin pozulması enerji sərfiyyatına, metabolizmin işinə və iştahanı tənzimləyən hormonlara təsir edə bilər. Xüsusilə əvvəlki tədqiqatlar göstərib ki, yuxunun 10 saatdan dörd saata qədər azaldılması qrelin (aclıq hormonu) səviyyəsini 28 % artırır və leptin (toxluq hormonu) səviyyəsini 18 % azaldır.