Diaqnoz Tibb Mərkəzinin təşkilatçılığı ilə nevroloqlar üçün “Neyrofizioloji diaqnostikanın müasir aspektləri. Video-EEQ-monitorinq analizi: Norma və patologiya” mövzusunda seminar keçirilib.

Aztibb.az-ın xəbərinə görə, tədbiri giriş nitqi ilə açan Diaqnoz Tibb Mərkəzinin Baş həkiminin müalicə işləri üzrə müavini Tofiq Əkbərov nevrologiya və neyrofiziologiya sahəsində son illər əldə olunan yeniliklərdən danışıb: “Müasir dövrdə geniş şəkildə həyatımıza sirayət edən nevrologiya təkcə elm sahəsi kimi deyil, sosial sahədə də təsirli olmaqla dünya miqyasında aktuallığı ilə diqqət çəkir. Bu sahədə yeni müasir üsullar tətbiq edilməyə başlanılıb. Elmi tədbirlərin keçirilməsi həkimlərin nəzəri və praktik biliklərinin artırmağa, qarşılıqlı fikir mübadiləsi aparmağa kömək edir”.

Sonra çıxış edən Respublika Neyrocərrahiyyə Xəstəxanasının Baş həkimi Elçin İbrahimov həkimlərin beynəlxalq təcrübəyə yiyələnməsinin, özlərini inkişaf etdirməsinin, tibbin bütün sahələri üçün yeni üsulların mənimsəməsinin zəruriliyini qeyd edib.

Seminarda Diaqnoz Tibb Mərkəzinin neyrofizioloqu Yelena Smirnova bildirib ki, EEQ, yəni Elektroensefaloqrafiya nevroloji xəstəliklərin diaqnostikasında tətbiq olunan önəmli müayinə üsuludur. EEQ və video EEQ monitorinqi epileptik ocaqlarının aşkarlanmasında, qıcolmalar, nevroz və nevrotik hallar, baş ağrıları, başgicəllənmələr, yaddaşın, diqqətin zəifləməsi, tiklər, nitqin ləngiməsi, enurezlər və s. hallarda beynin işini öyrənmək, fəaliyyətini qiymətləndirmək üçün yeganə və əvəzolunmaz üsullardandır. Tamamilə zərərsiz və şüasız bir müayinə üsulu olan EEQ uzunmüddətli, yuxu və oyaq halda bütün yaş qruplarında, hətta hamilə qadınlarda və süd verən analarda aparıla bilir.

Seminarda Diaqnoz Tibb Mərkəzinin radioloqu, tibb üzrə fəlsəfə doktoru Aydın Mirzəyev və Mərkəzin nevroloqu, EMQ üzrə mütəxəssis Nərgiz Adıgözəlova təqdimatlarla çıxış ediblər.

Qarşılıqlı fikir mübadiləsi şəraitində keçən seminarda iştirakçıları maraqlandıran suallar cavablandırılıb.