Türkiyənin Necmettin Erbakan Universiteti Tibb fakültəsində aparılan araşdırmada qara zirənin aktiv maddəsi olan timokinonun kimyaterapiya və radioterapiya proseslərinə əlavə edildiyi zaman xərçəng hüceyrələrini əhəmiyyətli dərəcədə məhv etdiyi müəyyən olunub.

Aztibb.az-ın medimagazin.com.tr-yə istinadla xəbərinə görə, Türkiyə Elmi və Texnoloji Araşdırmalar Şurasının (TÜBİTAK) dəstəklədiyi 6 illik elmi araşdırmada qara zirə bitkisində tapılan timokinonun ağciyər xərçəngi hüceyrələrinə təsiri araşdırılıb.

Tibbi biokimya, immunologiya, radiasiya onkologiyası və genetika kimi sahələrdən alimlərin qatıldığı layihədə qara zirənin ən təsirli komponenti olan timokinonun xərçəng hüceyrələrində apoptozu (proqramlaşdırılmış hüceyrə ölümü) tətiklədiyi müəyyən edilib.

Necmettin Erbakan Universiteti Tibb Fakültəsi Biokimya Bölümü rəhbəri prof. Mehmet Gürbilek və komandasının apardığı elmi araşdırma Q1 kateqoriyasında nüfuzlu bir elmi jurnalda nəşr olunub.