Los-Ancelesdəki Kaliforniya Universitetinin alimləri iddia edirlər ki, yüksək zəkaya sahib olmaqda qoxular mühüm rol oynayır. Hətta əhvali-ruhiyyə, konsentrasiya, yaddaş və əmək qabiliyyətinə də təsir göstərir. Məlum olub ki, xoş qoxular sadəcə rahat atmosfer yaratmır, həm də yuxu zamanı beynin fəaliyyətinə müsbət təsir edərək koqnitiv funksiyaları yaxşılaşdırır.

Aztibb.az xarici mətbuata istinadla bildirir ki, tədqiqat çərçivəsində 60-85 yaşlarında könüllülərin iştirakı ilə təcrübə keçirilib. Respondentlər iki qrupa bölünüb: birinci qrup adi şəraitdə yatıb, digər qrupun yataq otaqlarına isə hər gecə qızılgül, evkalipt, portağal, nanə, rozmarin, limon və lavanda kimi müxtəlif qoxular səpilib. Altı aylıq sınaq müddətindən sonra nəticələr nəzərəçarpacaq şəkildə dəyişib. Belə ki, ətirlərlə əhatə olunmuş yataqda yatan iştirakçıların yaddaş və öyrənmə də daxil olmaqla koqnitiv qabiliyyətləri digərləri ilə müqayisədə 26 faiz artıb.

Tədqiqatçılar qoxu siqnallarının beynin emosiyalar və xatirələrə cavabdeh olan sahələri, xüsusilə də limbik sistem, hippokamp ilə sıx əlaqəli olduğunu söyləyirlər. Beləliklə, qoxular bu sahələrə təsir edərək daha yaxşı yadda saxlamağa və öyrənməyə kömək edən prosesləri işə salır.