İcbari Tibbi Sığorta üzrə Dövlət Agentliyi və SGK əməkdaşları arasında müzakirələr aparılıb.

Agentlikdən Aztibb.az-a bildirilib ki, tədbirdə hər iki tərəfin məsul əməkdaşları tərəfindən tibbi yardımın maya dəyərinin hesablanması, ictimai rəyin öyrənilməsi, maarifləndirmə kampaniyalarının effektivliyinin təhlili, beynəlxalq əməkdaşlıq, icbari tibbi sığorta xidmətlərinin monitorinqi və insan resurslarının idarəedilməsi kimi mövzularda təqdimatlar edilib.

Görüşdə SGK-nın strateji inkişaf, ümumi tibbi sığorta, səhiyyə xidmətləri, media və ictimaiyyətlə əlaqələr, beynəlxalq əlaqələr və sosial təminat məsələləri üzrə səlahiyyətli nümayəndələri iştirak ediblər. Agentlik və SGK arasında imzalanmış Anlaşma Memorandumu çərçivəsində həyata keçirilən tədbirlər müzakirə olunub, gələcək əməkdaşlıq imkanları nəzərdən keçirilib.

İki gün davam edən tədbir qurumlar arasında sosial müdafiə və tibbi sığorta sahəsində əməkdaşlığın daha da gücləndirilməsi və fəaliyyətlərin effektivliyinin artırılması istiqamətində mühüm əhəmiyyət daşıyır. Əməkdaşlığın əsas məqsədi vətəndaşlara göstərilən tibbi xidmətlərin keyfiyyətinin və əlçatanlığının artırılmasına töhfə verməkdir.