Şirvan Şəhər Mərkəzi Xəstəxanasının nəzdindəki Şirvan Ürək Mərkəzində ilk dəfə periferik angioqrafiya əməliyyatı icra olunub.

Aztibb.az-a Şirvan RMX-dan verilən məlumata görə, region əhalisi üçün tibbi əlçatanlığın təmin olunması istiqamətində tədbirlər davam etdirilir. Əsasən, paytaxtdakı ixtisaslaşmış tibb müəssisələrində icra olunan müəyyən mürəkkəb əməliyyatlar artıq region xəstəxanalarında da həyata keçirilir.

Belə ki, tibb müəssisəsinə müraciət edən 1954-cü il təvəllüdlü Sabirabad rayon sakini (cinsi kişi)
uzun müddətdir ayaq ağrılarından əziyyət çəkirdi. Müayinə zamanı pasiyentdə şəkərli diabet fonunda sağ ayaqda xroniki yaralar müşahidə edilib. Aparılan periferik angioqrafiya nəticəsində, insan orqanizmində ən uzun damar hesab edilən SFA (bud arteriyası) tam olaraq 100 faiz tıxanmış vəziyyətdə aşkarlanıb.

Pasiyentə PTA (balon angioplastikası) müdaxiləsi uğurla həyata keçirilib və damarda tam açıqlıq əldə edilib.

Sözügedən əməliyyatı invaziv-kardioloq uzman dr. Nicat İbrahimov tərəfindən həyata keçirilib.

Əməliyyatdan sonra pasiyentin vəziyyəti stabilləşib və növbəti gün ambulator müalicə üçün evə yazılıb.