Türkmənistan Respublikasının paytaxtı Aşqabad şəhərində Murat Kariyev adına Türkmənistan Dövlət Tibb Universitetində (TDTU) I Beynəlxalq Tibb Konqresi keçirilib.

Konqresdə Azərbaycan Tibb Universitetinin Elmi Tədqiqatların İdarə Olunması Departamentinin şöbə müdiri, tibb elmləri doktoru Müşviq Həsənov və ATU-nun Uşaq cərrahiyyəsi kafedrasının müdiri, professor Ramiz Poluxov iştirak ediblər.

ATU-dan Aztibb.az-a bildirilib ki, tədbirin rəsmi açılış mərasimində M.Həsənov çıxış edərək, ATU-nun rektoru, professor Gəray Gəraybəylinin adından tədbir iştirakçılarını salamlayıb.

Sonra əməkdaşlar plenar iclaslarda elmi məruzələr oxuyub, verilən sualları ətraflı şəkildə cavablandırıblar.

TDTU-nun rektoru, professor Nargözəl Muratnəzərova çıxışı zamanı azərbaycanlı alimlərin tədbirdə iştirakına şərait yaratdığına görə, ATU-nun rektoru, professor G.Gəraybəyliyə xüsusi minnətdarlığını bildirib.

Konqresin sonunda əməkdaşlarımız xüsusi mükafata layiq görülüblər.