Azərbaycan Tibb Universitetinin (ATU) İctimai səhiyyə və Bakı Dövlət Universitetinin (BDU) Sosial elmlər və psixologiya fakültəsinin sonuncu kurs tələbələrinin Səhiyyə Nazirliyi İctimai Səhiyyə və İslahatlar Mərkəzində (İSİM) təcrübə kursu başlayıb. 

İSİM-dən Aztibb.az-a verilən xəbərə görə, təcrübə proqramının məqsədi tələbələrin ictimai səhiyyə sahəsində bilik və bacarıqlarını artırmaq, eləcə də xəstəliklərin profilaktikası, sağlam həyat tərzinin təbliği istiqamətində nəzəri və praktiki biliklərini genişləndirməkdir.

İSİM-in direktoru Qəhrəman Haqverdiyev geniş təqdimatla çıxış edərək, tələbələrə ictimai səhiyyənin əsas istiqamətləri və aktual mövzuları, Mərkəz tərəfindən həyata keçirilən sorğu və tədqiqatlar barədə ətraflı məlumat verib. O, tələbələrin bu sahədə peşəkar bilik və bacarıqlar qazanmasının vacibliyini qeyd edərək onlara təcrübə müddətində uğurlar arzulayıb.

ATU-nun İctimai sağlamlıq və səhiyyənin təşkili kafedrasının müdiri, tibb elmləri doktoru, dosent Yaqut Hacıyeva İSİM-də tələbələr üçün yaradılan şəraitə görə təşəkkür edib. O, bu il ictimai səhiyyə ixtisası üzrə Tibb Universitetinin ilk buraxılışının olduğunu nəzərə çatdıraraq bildirib ki, təcrübə dövrü nəzəri biliklərin real həyat situasiyalarında tətbiqini təmin edən ən vacib tədris mərhələlərindən biridir.

İSİM-də təcrübə keçən 70-ə yaxın tələbənin iştirakı ilə müxtəlif görüş, təlim və tədbirlərin təşkil edilməsi, ölkəmizdə həyata keçirilən dövlət proqramları, səhiyyə sistemində tətbiq olunan innovativ vasitələr və digər mövzularda gənclərə ətraflı məlumat verilməsi nəzərdə tutulub.

İnteraktiv şəkildə təşkil olunan təcrübə proqramı çərçivəsində tələbələrlə ictimai səhiyyə sahəsində qarşılıqlı maraq doğuran məsələlər ətrafında müzakirələr aparılır, suallar cavablandırılır, onlara müxtəlif materiallar təqdim olunur.