Yeni Zelandiyanın Otaqo Universitetinin alimləri retina mikrovaskulaturasının (gözün arxasındakı qan damarlarının) demensiyanın, xüsusilə Alzsheymer xəstəliyinin erkən mərhələlərdə aşkarlanmasına kömək edə biləcəyini müəyyənləşdiriblər.

Aztibb.az xəbər verir ki, "Science Daily" portalında yayımlanan məlumata görə, tədqiqatçılar 45 yaşlı iştirakçıların göz skanlarından əldə edilən məlumatları təhlil edərək daha dar arteriollar, daha geniş venulalar və daha incə retinal sinir lifləri təbəqələrinin demensiya riski ilə əlaqəli olduğunu ortaya çıxarıblar.

Tədqiqat müəlliflərindən doktor Aşleq Barret-Yunq nəticələrin demensiyanın erkən mərhələdə müəyyənləşdirilməsi sahəsində aparılan əvvəlki araşdırmalarla uyğunluq təşkil etdiyini bildirib. O qeyd edib ki, erkən diaqnostika və müdaxilə demensiyanın gedişatının ləngiməsi üçün mühüm əhəmiyyət kəsb edir. Lakin hazırkı test metodlarının ya yetərincə həssas olmaması, ya da yüksək xərc və əlçatanlılıq baxımından məhdudiyyətlər bu sahədə irəliləyişə əngəl yaradır. Tədqiqat eyni zamanda beynin vəziyyətini qeyri-invaziv üsullarla qiymətləndirmək üçün süni intellekt texnologiyalarının tətbiqinə dair gələcək perspektivləri də gündəmə gətirir. Lakin mütəxəssislər bu metodların hələ erkən mərhələdə olduğunu və real tətbiq üçün əlavə işlərə ehtiyac duyulduğunu vurğulayıblar.