Aparılan son tədqiqatlar nəticəsində günəbaxan tumları "superfood" statusu alıb. Belə ki, bu məhsulun qocalmanın qarşısını aldığı müəyyən edilib. Araşdırmalarda günəbaxanla yanaşı, balqabaq, küncüt və çia toxumlarının da tərkibində hüceyrələri qocalmaqdan qoruyan maddələr aşkar olunub.

Aztibb.az-ın xarici mətbuata istinadla xəbərinə görə, mütəxəssislər belə qənaətə gəliblər ki, toxumlar təkcə orqanizmin deyil, beynin də gənc qalmasına kömək edir. Belə ki, onların tərkibindəki omeqa-3 yağ turşuları koqnitiv funksiyaları yaxşılaşdırır. Həmçinin maqneziumla da zəngin olan bu məhsullar mərkəzi sinir sisteminə sakitləşdirici təsir göstərir, stres və narahatlıq səviyyəsini azaltmağa, həyat keyfiyyətini yaxşılaşdırmağa kömək edir, ömrü uzadır.

Bundan əlavə, mütəxəssislər istənilən giləmeyvə və nori dəniz yosununun (suşinin hazırlanmasında istifadə olunan yosun növü) da eyni təsirə malik olduğunu bildiriblər. Onlar izah ediblər ki, həm sağlam, həm də daha az kalorili giləmeyvələr antioksidantlarla zəngin olduğu üçün iltihabla mübarizə aparmağa kömək edir. Nori də yod və digər faydalı maddələr ehtiva etdiyi üçün antiinflamatuar (iltihab əleyhinə) təsirə malikdir.