Azərbaycan Kardiologiya Cəmiyyətinin Preventiv Kardiologiya və Reabilitasiya işçi qrupunun rəhbəri, Azərbaycan Tibb Universitetinin dosenti, Milli İdman Tibbi və Reabilitasiya Elmi-Praktik İnstitutunun baş həkimi, dosent Rəhimə Qabulova Milanda keçirilən "ESC Profilaktik Kardiologiya 2025" beynəlxalq konqresində iştirak edib.

Bu xəbər Aztibb.az-a Milli İdman Tibbi və Reabilitasiya Elmi-Praktik İnstitutundan verilib.

Bildirilib ki, konqres çərçivəsində o, “2025-ci ildə qlobal risk reallıqları” adlı sessiyada sədr, həmçinin “Gündəlik praktikada hipertoniyanın idarə edilməsi” adlı sessiyada məruzəçi qismində çıxış edib.

Azərbaycanlı alim “Hipertoniya xəstəliyinin dərmanla müalicəsində səmərəliliyin artırılması yolları” mövzusunda məruzəsini təqdim edib.

Bununla yanaşı, dosent Rəhimə Qabulova 2024-cü ildən etibarən assosiativ redaktor kimi fəaliyyət göstərdiyi Avropa Kardiologiya Cəmiyyətinin “European Journal of Preventive Cardiology” (EJPC) jurnalının redaksiya heyətinin toplantısında da iştirak edib.

O, müxtəlif ürək-damar risk qruplarına aid ölkələrin milli koordinatorlarının dəvət olunduğu CVD-nin qarşısının alınması üzrə Milli Koordinatorların Seminara da qatılıb.

Dosent Rəhimə Qabulova konqres çərçivəsində Avropa Preventiv Kardiologiya Assosiasiyasının İdman kardiologiyası işçi qrupunun aparıcı simaları ilə bu sahədə planlaşdırılan layihələri müzakirə edib və Azərbaycanda idman kardiologiyasının inkişaf perspektivləri ilə bağlı fikir mübadiləsi aparıb.