Çində süni ürək transplantasiyası əməliyyatı keçirən 7 yaşlı uşağın dünyada bu əməliyyatı keçirən ən gənc insan olduğu açıqlanıb.

Aztibb.az-ın www.tbsnews.net-ə istinadla məlumatına görə, ürəyin daim böyüməsinə və genişlənməsinə səbəb olan genetik və xroniki xəstəlik olan “dilatasiya kardiomiopatiyası” diaqnozu qoyulan uşağa uyğun donor tapmaq mümkün olmadığı üçün həkimlər 2024-cü ilin mayında süni ürək transplantasiyasına qərar veriblər.

Ayın əvvəlində təxminən beş saat davam edən əməliyyatda həkimlər uşağa çəkisi 45 qram, diametri 2,9 santimetr olan süni ürək yerləşdiriblər.

Beləliklə, ürək xəstəliyinin ağır mərhələsi olan 7 yaşlı uşaq dünyada süni ürək nəqli edilən ən gənc insan olub.

Həkimlər əməliyyatdan bir gün sonra uşağın nəfəs almağa başladığını və vəziyyətinin getdikcə yaxşılaşdığını bildiriblər.