Şimali Afrikada tapılan iki mumiyanın DNT analizləri insan tarixinin nəsil şəcərəsini yenidən yazmağa səbəb ola bilər.

Aztibb.az-ın www.dailymail.co.uk-a istinadla xəbərinə görə, Almaniyanın Max Plank İnstitutunun alimləri hazırda Liviya ərazisində aşkarlanan bu qədim insan qalıqlarında 7 min il əvvələ aid, elmə məlum olmayan bir insan qrupuna məxsus genetik izlər aşkar ediblər.

Saxara səhrasında yaşamış bu itmiş qrupun genetik quruluşu elm adamlarının qədim dövrlərdə Afrikaya daxil olan və qitədən çıxan insanlar haqqında gözlədiklərindən tamamilə fərqlidir. Araşdırmalara görə, 14.500 il əvvəl bu ərazi "Yaşıl Səhra" kimi tanınan münbit və yaşıl bir bölgə olub.

Bu səbəbdən alimlər hesab edirdilər ki, həmin dövrdə bu ərazilərdə yaşamış qədim insanlar həm "Sub-Saxara" Afrikasından, həm də Yaxın Şərqdən gələn digər insan tayfaları ilə sıx təmasda olublar. Lakin yeni tapıntılar göstərir ki, bu qədim qrup tamamilə təcrid olunmuş şəkildə yaşayıb və digər insan populyasiyaları ilə demək olar ki, heç bir genetik qarışma baş verməyib. Ən maraqlısı isə odur ki, mumiyaların DNT-sində Afrikadan kənarda yaşayan qədim insanlara nisbətən Neandertal genlərinə çox az rast gəlinib. Bu isə tədqiqatçıların qədim dünya və insan qrupları arasındakı qarşılıqlı əlaqə ilə bağlı əvvəlki fikirlərinə ciddi sual işarəsi qoyur. Tədqiqatın birinci müəllifi, Max Plank Təkamül Antropologiyası İnstitutundan Nada Salem bildirib: “Tədqiqatımız Şimali Afrikadakı əhali tarixi ilə bağlı əvvəlki fərziyyələri şübhə altına alır və uzun müddət təcrid olunmuş, dərin köklərə malik bir genetik xəttin mövcudluğunu ortaya qoyur.”