Azərbaycanın möcüzəli və əfsanəvi məkanlarından olan Naftalanda həyata keçirilən tədbirlər həm kəmiyyət, həm də keyfiyyət göstəricilərinə görə konkret və ünvanlı olması ilə diqqəti çəkir. Yer üzünün sehrli və ecazkar, şəfa mənbəyi olan Naftalana dövlət başçısı cənab İlham Əliyevin sonsuz diqqət və qayğısı nəticəsində keçmiş şöhrətinə qayıtmış, sözün əsl mənasında dünyada təbabəti, təbiəti və qonaqpərvərliyi ilə tanınır.
Aztibb.az xəbər verir ki, Naftalan unikal müalicəvi əhəmiyyəti olan "Naftalan" nefti ilə məşhurdur, sağlamlıq turizmi xidmətləri sahəsində böyük potensiala malikdir. Dünya standartlarına cavab verən hotellər, pansianatlar, müalicə ocaqları turistləri cəlb edir. Ölkə başçısının xüsusi diqqəti sayəsində Naftalanda son illər turizm sektorunun inkişaf etdirilməsi istiqamətində bir çox layihələr həyata keçirilmiş və şəhərin infrastrukturu tamamilə yenilənmişdir. Məhz Naftalan qonaqlar tərəfindən gecələmə sayına görə turizm şəhərləri arasında ən öncül mövqelərdən birinə sahibdir. Şəhərdə fəaliyyət göstərən hotel və müalicə sağlamlıq mərkəzlərində turist məmnunluğunu təmin etmək üçün sağlam rəqabət mövcuddur.
Cari ilin birinci rübü ərzində şəhərə müalicə məqsədilə 6432 nəfər turist səfər edib və onların 2367 nəfəri xaricilərdir.
Müalicəvi nefti ilə min bir dərdə dərman olan Naftalan kurort şəhərinin dinamik şəkildə dəyişir və xidmət potensialı ilə dünyanın ən cəlbedici müalicə turizm məkanlarından birinə çevrilir.
