Azərbaycan Tibb Universitetində (ATU) aralıq imtahanlara start verilib. ATU-nun rektoru professor Gəray Gəraybəyli imtahan prosesini izləyib və tələbələrlə söhbət aparıb.

Bu məlumat Aztibb.az-a ATU-dan verilib.

Bildirilib ki, rektor profesor G.Gəraybəyli sessiyanın təşkili, prosesin gedişatı ilə bağlı tələbə və nəzarətçilərin fikirlərini öyrənib. ATU-nun rəhbər və məsul şəxsləri prosesin şəffaf aparılması, imtahanların qaydalara uyğun şəkildə keçirilməsi, nəzarət avadanlıqlarının gücləndirilməsi barədə rektora məlumat veriblər.

Universitetin İnformasiya Texnologiyaları departamentinin rəhbəri Rəmzi Əliyev həyata keçirilən tədbirlər sırasında imtahan zalında kameraların yeniləndiyini, tələbələrin intemet (IP) və fiziki izolyasiyasının təmin olunduğunu bildirib. Bundan əlavə, bu il imtahan sualları öncədən ekspertlər tərəfindən təsdiqlənib və sayı dəqiqləşdirilib. Sualların keyfiyyətcə qiymətləndirilməsi sonradan imtahan nəticələri ilə bağlı apelyasiyaların azalmasına təsir edəcək.

Qeyd edək ki, ATU-da ixtisas fənləri üzrə aparılan aralıq imtahan sessiyası aprelin 26-dək davam edəcək.