Amerikalı elm adamları ən mürəkkəb orqanımız olan beynimizlə bağlı indiyə qədər bilinməyən faktı ortaya çıxarıblar. Belə ki, tədqiqatçılar beynin sözləri yadda saxladığı sahəni müəyyən ediblər.

Aztibb.az xarici mətbuata istinadla bildirir ki, "Brain Communications" jurnalında dərc olunan tədqiqatın nəticələri göstərib ki, beynin prefrontal, temporal və singulat kortekslərinin, həmçinin hipokampusun kiçilməsi sözlərin xatırlanmasını çətinləşdirir. Tədqiqatda 84 temporal epilepsiya və hipokampal skleroz xəstəsi, eləcə də 43 sağlam insan iştirak edib. Yüksək dəqiqlikli MRT vasitəsilə beynin müxtəlif hissələrinin ölçüsü və forması analiz olunub. İştirakçılar həmçinin şifahi yaddaş testlərindən keçirilib. Kiçik beyin bölgələrinin zəif yaddaşla əlaqəli olduğu müəyyənləşib.

Tədqiqat rəhbəri professor Con Dunkan bildirib ki, beynin hansı hissələrinin sözlərin xatırlanması üçün vacib olduğunu anlamaq epilepsiya xəstələrinin neyrocərrahi müalicəsinə istiqamət verməyə kömək edə bilər. Bu kəşf əməliyyat zamanı yaddaş və dil üçün mühüm olan beyin bölgələrinin qorunmasına şərait yaratmaq üçün də əlverişlidir.