Azərbaycan Qida Təhlükəsizliyi Agentliyi (AQTA) və Səhiyyə Nazirliyinin birgə layihəsi çərçivəsində Bakı Slavyan Universitetində elektron siqaretlərin (veyplərin) sağlamlığa təsirləri barədə maarifləndirici görüş keçirilib.
Agentliyin İnformasiya təminatı və innovative həllər şöbəsindən Aztibb.az-a verilən məlumata görə, görüşdə universitetin tələbələri və müəllim heyəti iştirak edib.
Görüş zamanı çıxış edən mütəxəssislər veyplərin insan orqanizminə vurduğu zərərlər, onların tərkibi və yaratdığı asılılıq barədə ətraflı məlumat veriblər. Qeyd olunub ki, parlaq rənglər, şirin meyvə dadları və sosial mediada yayılan cəlbedici görüntülər elektron siqaretlərin gənclər arasında populyarlaşmasına səbəb olub.
Qeyd edilib ki, veyplərin tərkibində nikotin, ağır metallar və digər toksik maddələr mövcud olduğundan həmin maddələr ürək-damar, tənəffüs və sinir sistemi üçün ciddi təhlükə yaradır.
Görüşün yekununda iştirakçılarla fikir mübadiləsi aparılıb, onların sualları cavablandırılıb və sağlam həyat tərzinə üstünlük vermələri tövsiyə olunub.
