İranın Alborz Tibb Elmləri Universitetinin alimləri "fast food" qidaların daha bir fəsadını ortaya çıxarıblar. Belə ki, elm adamları bu qidaların depressiya riski ilə əlaqəli olduğunu aşkar ediblər.

Aztibb.az xəbər verir ki, "Journal of Affective Disorders" jurnalında dərc olunan araşdırmanın nəticələri göstərib ki, həftədə iki dəfədən çox "fast food" yeyən insanların onu az istehlak edənlərlə müqayisədə depressiya riski 24 faiz daha yüksəkdir. Həmçinin məlum olub ki, bu qidanın həftədə bir dəfə belə qəbulu depressiya ehtimalını 4 faiz artırır. Əlavə təhlillər göstərib ki, belə qidaların istehlakı ilə depressiya arasındakı əlaqə daha çox orta və ağır piylənmədən əziyyət çəkən insanlar arasında keçərlidir.

Alimlərin fikrincə, onların kəşfi piylənmənin "fast food" istehlakı ilə depressiya arasında vasitəçi rolunu oynaya biləcəyi fərziyyəsini təsdiqləyir. Qeyd edək ki, mütəxəssislərin qənaətləri Milli Sağlamlıq və Qidalanma Müayinəsi Sorğusunun 17,4 mindən çox iştirakçısının məlumatlarının təhlilinə əsaslanır. Nəticələrə görə, qadınlarda 11, kişilərdə isə 7 faiz depressiv simptomlar qeydə alınıb.