İnsanlar arasında belə bir fikir formalaşıb ki, çəki atmaq üçün ən əlverişli qida qarabaşaqdır. Sosial şəbəkələr bu dənli bitkiyə "yağ düşməni" statusu verən möcüzəvi diyet hekayələri ilə doludur. Bəzi insanlar da bu trendə qoşulub "axı bu qarabaşaqdır" deyərək günün istənilən vaxtında porsiyaya məhəl qoymadan qarabaşaq yeyirlər. Bəs doğrudanmı bu qida hədəfə çatmaq üçün ideal seçimdir?

Aztibb.az xəbər verir ki, qarabaşaq haqqında olan ən böyük yanlış onun az kalorili olmasıdır. Əslində 100 qram quru qarabaşaqda təxminən 330 kilokalori var. Bişirildikdə əgər üstünə yağ, şəkər və ya süd əlavə edilərsə bu, artıq yüngül qəlyanaltı yox, tam bir nahar olur. Daha bir "tələ" isə yüksək karbohidrat tərkibidir. 100 qramlıq quru porsiyada 70 qramdan çox karbohidrat var. Müqayisə üçün ağ düyüdə bu göstərici 80 qramdır. Qarabaşağın qlikemik indeksi digər dənli bitkilərlə müqayisədə aşağı olsa da, tez-tez yeyildikdə qanda şəkər səviyyəsinin dəyişməsi ilə nəticələnir. Digər tərəfdən isə onun tərkibində yetərli qədər lifin olmaması yeməkdən 1-2 saat sonra aclıq hissi yaradır və insanı qəlyanaltı etməyə vadar edir. Qarabaşağın "metabolizmi sürətləndirdiyini" düşünmək də yanlışdır. Onun piyləri digər dənli bitkilərdən daha effektiv əritdiyinə dair elmi sübut yoxdur. Əksinə, istənilən mono-diyet metabolizmi ləngidir. Orqanizm müxtəlif qida maddələrini almayan zaman enerji rejiminə keçir. Adi qidalanmaya qayıtdıqda isə çəki tez bir zamanda, hətta artıqlaması ilə geri qayıdır. Başqa bir problem isə psixoloji amildir.

Qarabaşaq diyeti dadsızlığı və təkrarlığı səbəbindən tez bezdirir. İnsanlar məhdudiyyətlərdən yaranan stresi gecə yeməkləri ilə kompensasiya edir və bununla bütün səyləri puç olur.