bOPV – Poliomielit xəstəliyinə qarşı istifadə olunan peyvənddir.

Aztibb.az xəbər verir ki, Poliomielit xəstəliyi - sinir sistemini zədələyə, əzələlərin iflicinə gətirib çıxara və ölümlə nəticələnə bilən yoluxucu xəstəlikdir. Yoluxma fekal-oral (çirkli əllər, yoluxmuş qida, əşyalar, oyuncaqlar, çirkab sular və s.) və ya hava-damcı yolu ilə, əsasən ağız boşluğuna virusun düşməsi ilə baş verir. Poliomielitə, adətən, 15 yaşa qədər uşaqlar, nadir hallarda isə böyüklər də yoluxa bilərlər. Ən çox 5 yaşadək uşaqlar xəstələnirlər.

Poliomielitin ilkin əlamətləri yoluxmadan sonra 3-35 gün ərzində müşahidə olunur. Xəstəlik, adətən, soyuqdəymə simptomları və hərarətin yüksəlməsi ilə başlayır. Sonra isə möhkəm əzələ ağrıları, süst ifliclər inkişaf edir, bunun nəticəsində tənəffüs çətinləşir və xəstəlik ölümlə nəticələnə bilər.

Bununla bağlı hər bir uşaq 2 yaşadək mütləq poliomielit vaksininin 5 dozasını almalıdır. Peyvəndin yalnız tam kursunu alan uşaq poliomielitdən qorunmuş hesab olunur.

Uşaqlarınızı gələcəkdə bu kimi ağır xəstəliklərdən qorumaq üçün vaxtında peyvənd etdirin!

Bunun üçün siz yaxınlıqdakı ilkin səhiyyə xidməti göstərən tibb müəssisəsinə yaxınlaşa və daha ətraflı məlumat ala bilərsiniz!