Alimlər xəbərdarlıq ediblər ki, hazır qidalar bioloji yaşlanma prosesini əhəmiyyətli dərəcədə sürətləndirə bilər.

Aztibb.az-ın medimagazin.com.tr-yə istinadla məlumatına görə, bu yaxınlarda edilən yeni araşdırma qeyri-sağlam yemək vərdişlərinin qocalmanı hüceyrə səviyyəsində sürətləndirə biləcəyini göstərib. Araşdırmaya görə, daha az tərəvəz və meyvə, daha çox qırmızı ət, hazır yeməklər və şəkərli içkilər qəbul edən fərdlərdə bioloji qocalma prosesi daha sürətlə gedir.

Bioloji yaş fərdin hüceyrələrinin yaşını əks etdirir və bu yaş xronoloji yaşdan fərqlənə bilər. Alimlər bildirirlər ki, bioloji yaş xəstəlik riski və gözlənilən ömür uzunluğu ilə daha sıx bağlıdır. Bu fərq DNT-dəki kimyəvi dəyişiklikləri təhlil edən "epigenetik saatlar" vasitəsilə ölçülür.

Tədqiqatda iştirak edən elm adamları sürətli və balanssız qidalanma vərdişlərinin təkcə çəki və ya həzm sistemi problemləri ilə məhdudlaşmadığını, eyni zamanda bədənin yaşlanma prosesinə də təsir edə biləcəyini vurğulayıblar.