Azərbaycan Qida Təhlükəsizliyi İnstitutunun (AQTİ) mütəxəssisləri Braziliya və Türkiyədən ölkəmizə yüksək risk qrupuna aid heyvan mənşəli qida və yem məhsulları idxal edən iki müəssisədə yerində qiymətləndirmə aparıblar.

 

AQTİ-dən Aztibb.az-a verilən xəbərə görə, “Qida təhlükəsizliyi haqqında” qanunun tələblərinə əsasən aparılan qiymətləndirmə Braziliyada yerləşən “Villa Germania Alimentos” və Türkiyədə fəaliyyət göstərən "Skretting Yem Üretim Ticaret” müəssisələrində həyata keçirilib.

 

Şirkətlərin ixrac potensialı, gigiyenik vəziyyəti, qida təhlükəsizliyi üzrə tələblərin qarşılanma səviyyəsi, məhsulların izlənəbilmə sistemlərinin mövcudluğu və digər məqamlar mütəxəssislər tərəfindən araşdırılaraq təhlil edilib.

Qiymətləndirmənin nəticəsinə uyğun olaraq, bu müəssisələr Azərbaycan Respublikasının Qida Təhlükəsizliyi Agentliyi (AQTA) tərəfindən təsdiq edilib.

 

Qeyd edək ki, qanunvericiliyə əsasən xarici qida obyektləri təsdiqlənmədikdə, bu müəssisələrdən ölkəmizə yüksək risk qrupuna aid heyvan mənşəli qida və yem məhsullarının idxalına icazə verilmir.