Ağdaş Rayon Mərkəzi Xəstəxanasının həkim-mütəxəssisləri Ağzıbir kəndində səyyar tibbi müayinələr icra edib.

Xəstəxanadan Aztibb.az-a bildirilib ki, müayinələr müxtəlif ixtisaslardan olan həkimlərdən ibarət səyyar briqadalar tərəfindən həyata keçirilib.

Səyyar müayinələrə 10-u uşaq, 59 nəfəri isə 18 yaşdan yuxarı olmaqla, ümumilikdə 69 nəfər kənd sakini cəlb edilib. Müayinələr çərçivəsində sakinlərə ümumilikdə 99 adda tibbi xidmətlər göstərilib.

Qeyd edək ki, kəndlərdə keçirilən tibbi müayinələrin məqsədi rayon mərkəzindən kənarda məskunlaşmış əhaliyə göstərilən tibbi xidmətlərin əlçatanlığını, peyvənddən kənar qalmış uşaqların vaksinasiyasını, qeydiyyatsız hamilələrin aşkarlanmasını, hamilə və yenidoğulmuşların patronajını, əhalinin peyvənd haqqında maarifləndirilməsini, laborator, instrumental müayinələrin keçirilməsini təmin etməkdir.