TƏBİB region xəstəxanalarında vətəndaşlara göstərilən tibbi xidmətlərin sayının və keyfiyyətinin artırılması, o cümlədən bu günədək yalnız paytaxtda icra olunun cərrahi əməliyyatların bölgə xəstəxanalarında da icra olunması istiqamətində yenilikləri davam etdirir.

 

Aztibb.az-a TƏBİB-dən verilən məlumata görə, Zaqatala Rayon Mərkəzi Xəstəxanasında ilk dəfə həyata keçirilən laporoskopik xolesistektomiya əməliyyatı uğurla başa çatıb.

 

64 yaşlı pasiyent üzərində həyata keçirilən laporoskopik xolesistektomiya (qapalı üsulla öd kisəsinin xaric edilməsi) əməliyyatından sonra şəxsin vəziyyəti qənaətbəxş hesab edilir. Onun müalicəsi stasionar şəraitdə müvafiq şöbədə davam etdirilir.

 

Qeyd edək ki, sözügedən əməliyyat icbari tibbi sığortanın Xidmətlər Zərfi çərçivəsində icra olunur.

 

Laporoskopik metodla aparılan əməliyyatlarda videokameranın köməyindən, nazik alətlərdən istifadə edilir və bu cür əməliyyatların üstünlüyü odur ki, ənənəvi cərrahi üsullardan fərqli olaraq daha kiçik ölçülü kəsiklər açılır, nəticədə pasiyentin reabilitasiya dövrü daha sürətli və asan olur. Optik cihazın kəsik yolu ilə əməliyyat sahəsinə daxil olması cərraha həmin nahiyəni monitorda rahatlıqla görməyə imkan verir. Laporoskopik əməliyyatlar daha az travmalı olduğundan ağırlaşma olmadıqda pasiyent növbəti gün evə yazılır.