TƏBİB regionlarda ixtisaslaşdırılmış tibbi xidmətlərin keyfiyyətinin yüksəldilməsi, xəstəxanaların ən son texnoloji avadanlıqlarla təchiz edilməsi və o cümlədən bir sıra cərrahi əməliyyatların icrası üçün lazımi şəraitin yaradılması istiqamətində tədbirləri davam etdirir.

 

Aztibb.az-a TƏBİB-dən bildirilib ki, Quba Rayon Mərkəzi Xəstəxanasının nəzdində fəaliyyət göstərən Regional Travmatoloji Mərkəzdə ilk dəfə olaraq boş pəncə və varus deformasiyasının, Axil vətərinin tenoplastikası, qamış əzələsi ilə uzun incik əzələsinin vətərinin transpozisiyası ilə patologiyanın aradan qaldırılması əməliyyatı icra edilib.

 

İlk dəfə 14 yaşlı pasiyent üzərində icra olunan əməliyyat uğurla başa çatıb. Hazırda pasiyentin vəziyyəti qənaətbəxş qiymətləndirilir.

 

Qeyd edək ki, Regional Travmatoloji Mərkəz Quba rayonu ilə yanaşı, Xaçmaz, Qusar, Şabran və Siyəzən rayonlarının əhalisinə travmatoloji xidmətlər göstərir, həmçinin müvafiq profil üzrə mürəkkəb klinik hallar zamanı regionun tibb müəssisələrinə konsultativ-diaqnostik yardım göstərilir.

 

Mərkəzin yaradılmasında məqsəd regionda yaşayan əhalinin müvafiq profil üzrə ixtisaslı tibbi xidmətə əlçatanlığının təmin edilməsindən ibarətdir.

 

İndiyədək yalnız paytaxtda yerləşən ixtisaslaşmış tibb müəssisələrində icrası mümkün olan bir sıra mürəkkəb travmatoloji əməliyyatlar sözügedən Mərkəzdə həyata keçirilir.

 

Xatırladaq ki, Regional Travmatoloji Mərkəz 2023-cü ildə Quba Rayon Mərkəzi Xəstəxanasının nəzdində yaradılıb.