TƏBİB-in təşkilatçılığı, “PAŞA Sığorta”nın, “Birgə və Sağlam” İctimai Birliyinin, Autizm Mərkəzinin və “Artlife Rəsm Qalereyası”nın dəstəyi ilə “Autizm xəstəlik deyil, fərqlilikdir” adlı layihə uğurla icra olunub.

Bu barədə Aztibb.az-a TƏBİB-dən məlumat verilib.

Bildirilib ki, layihənin məqsədi autizmli şəxslərin cəmiyyətə inteqrasiyasına yardım etmək və inklüziv düşüncə tərzini aşılamaqdır.

Korporativ sosial məsuliyyət layihəsi çərçivəsində “Birgə və Sağlam” İctimai Birliyinin mərkəzində təhsil alan uşaqlar öz xəyal dünyalarındakı rənglərlə "Mənim rəngli dünyam" konseptli rəsmlər çəkiblər. Onların çəkdiyi rəsmlərin Respublika Pediatriya Mərkəzində daimi sərgilənməsi nəzərdə tutulub.

Tədbir Azərbaycanda ilk inklüziv kafe olaraq neyromüxtəlifliyi olan gənclərin cəmiyyətə inteqrasiyasını dəstəkləyən “Kashalata Cafe”də baş tutub.

Qeyd edək ki, autizmin ağır, orta və yüngül dərəcələri var. Bu spektr müxtəlif səbəblərlə bağlı olaraq uşaqlığın ilk üç ili ərzində ünsiyyət, göz kontaktının, sosial bacarığın olmamasının nəticəsi kimi özünü göstərən məhdud maraq və təkrarlayıcı hərəkətlərlə ortaya çıxan kompleks inkişaf pozuntusudur.

Aparılmış tədqiqatlara əsasən dünya əhalisinin təxminən 1%-i, yəni 70 milyona yaxın insan autizmlidir.