Qlükoza orqanizmin əsas enerjı mənbəyidir. Qlükozanın çatışmazlığı zamanı "hipoqlikemiya" inkişaf edir. Şəkərli diabet xəstələrində hipoqlikemiya daha ağır keçir və çox ağır pozulmalarla hətta ölümlə nəticələnə bilər.

Bu barədə Aztibb.az-a Xətai Tibb Mərkəzinin terapevti, uzman doktor Çinarə Səfərova məlumat verib.

Həkim bildirib ki, şəkərli diabet xəstəsi hipoqlikemiya zamanı bu kimi simptomları hiss edir:
- kəskin aclıq
- halsızlıq və yorğunluq
- titrəmə
- soyuq tər
- ürəkdöyünməsinin tezləşməsi
- patoloji qorxu
- görmənin pozulması
- dil və dodaqların keyiməsi.

Onun sözlərinə görə, koma çox tez inkişaf edə bilər.
Hipoqlikemik koma tək şəkərli diabet zamanı deyil, insulinoma (insulin ifraz edən toxumasının şiş xəstəliyi) zamanı da baş verə bilər. İnsulinoma zamanı koma qəfildən baş verir:

"Hipoqlikemiyanın ilk simptomlarında xəstəyə dərhal 2 tikə şəkər, 1 qaşıq bal və ya şirin mürəbbə, peçenye vermək lazımdır. Daha sonra xəstəyə sıyıq və ya 1 tikə çörək, şirin meyvə vermək olar. Xəstə huşunu itirirsə, onun dilinin altına 1 tikə şəkər qoyun, xəstəni böyürü üstə uzandırın (xəstədə qusma inkişaf edə bilər).
Adətən 5-10 dəqiqə ərzində xəstənin vəziyyəti düzəlməlidir".