Səhiyyə Nazirliyi və “PAŞA Holding”in birgə təşkilatçılığı ilə “Erkən müayinə can qurtarır” adlı növbəti aksiya Xaçmaz rayonunda reallaşıb.

Nazirlikdən Aztibb.az-a bildirilib ki, diabet xəstəliyinin erkən müayinəsi üçün təşkil olunan aksiyada Xaçmaz və ətraf rayonlardan olan 300 nəfər müayinə olunub.

Aksiyanın məqsədi diabet xəstəliyinin erkən mərhələlərində diaqnostikasını aparmaq, xəstəliyin qarşısını almaq və yerli əhali arasında sağlam həyat tərzi barədə maarifləndirməni gücləndirməkdir.

Tibbi aksiya zamanı sakinlər arasında erkən müayinənin əhəmiyyəti haqqında maarifləndirici söhbətlər aparılıb. Onlara diabetin erkən mərhələlərdə aşkar olunmasının vacib olduğu izah edilib. Sakinlərin diqqətinə çatdırılıb ki, erkən müayinə diabetin həm fiziki, həm də sosial təsirlərini azaltmağa kömək edir. Diabetin nəzarət altında saxlanması ilə xəstələr gündəlik həyatlarında daha aktiv və sağlam ola bilərlər.