Hacıqabul rayonunda səhiyyə işçiləri arasında “Sağlamlığa Doğru Qaç!” adlı layihəyə keçirilib.

Aztibb.az-ın xəbərinə görə, layihə Azərbaycan Səhiyyə İşçiləri Həmkarlar İttifaqı Respublika Komitəsinin təşəbbüsü və təşkilatçılığı ilə baş tutub.

Tədbirin təşkilatçıları və dəvət olunan qonaqlar əvvəlcə Ulu Öndərin abidəsi önünə gül dəstələri düzərək xatirəsini ehtiramla yad ediblər. Tədbirdə Azərbaycan Dövlət Himni səsləndirilib, torpaqlarımızın bütövlüyü uğrunda canından keçən şəhidlərimizin xatirəsi anılıb.

Daha sonra Hacıqabul RİH başçısı Sevindik Hətəmov və Azərbaycan Səhiyyə İşçilər Həmkarlar İttifaqı Respublika Komitəsinin (ASİHİRK) sədri Elnara Muradova çıxış edərək əhalinin sağlamlığının yaxşılaşdırılması istiqamətində son illər ölkəmizdə görülən işlərdən, qəbul edilən qanunlardan və Dövlət Proqramlarından söz açaraq, tədbirin böyük əhəmiyyət kəsb etdiyini bildiriblər.

İlk yarışa Hacıqabul rayon Səhiyyə İşçiləri Həmkarlar İttifaqı (SİHİ) şura üzvləri ilə bərabər Salyan, Şirvan, Neftçala, Saatlı, Sabirabad və Kürdəmir rayon həmkar üzvləri olmaqla 230 nəfərə yaxın iştirakçı qatılıb.

Növbəti mərhələ yarışları Ağcabədi, Mingəçevir, Lənkəran, Gəncə, Qusar, Şamaxı rayonları, Naxçıvan, Bakı şəhərlərində keçiriləcək.

I, II, III yerlərin qalibləri mükafatlandırılaraq Xankəndi şəhərində-final yarışına qatılmaq imkanı əldə ediblər.

Sonda tədbirə qatılan yarışmaçılara medallar və müxtəlif xatirə hədiyyələri verilib.