Qərbi Avropada məlum olan ən qədim insan üzünün fraqmenti tapılıb. Sözügedən tapıntı bölgədə erkən Pleystosen dövründə iki fərqli insan növünün yaşadığını təsdiqləyir.

Aztibb.az euronews.com-a istinadla bildirir ki, tədqiqatın nəticələri “Nature” jurnalında dərc edilib.

Üz fraqmenti 2022-ci ildə İspaniyada yerləşən arxeoloji qazıntı sahəsindən aşkar edilib. Təxminən iki il ərzində aparılan ətraflı analizlər nəticəsində müəyyən edilib ki, bu üz fraqmenti yetkin bir insana məxsus olub və üzün sol hissəsini təşkil edir. Tapıntıya tədqiqatçılar tərəfindən çəhrayı (“pink”) adı verilib.

Rekonstruksiya və təsnifat prosesində ənənəvi konservasiya üsulları ilə yanaşı, qabaqcıl 3D təsvir və analiz texnologiyalarından istifadə edilib. Kəşf edilən üz fraqmenti ilə yanaşı, qazıntı sahəsində daş alətlər və kəsilmiş heyvan qalıqları da tapılıb. Bu tapıntılar həmin dövrdə yaşamış erkən avropalıların mövcud heyvan ehtiyatlarını yaxşı tanıdıqlarını və onlardan sistemli şəkildə istifadə etdiklərini göstərir.