Salyan Rayon Mərkəzi Xəstəxanasında Novruz bayramı münasibətilə tədbir keçirilib.

 

Aztibb.az-ın xəbərinə görə, yazın gəlişi, torpaqla birgə insan ruhunun da oyanışını bayram etdiyimiz Novruzu xəstəxana işçiləri bu dəfə fərqli qarşılayıblar.

 

Bahar qızı sağlamlıq diləkləri yazılmış xüsusi açıqcalarla vətəndaşların bayramını təbrik edib, onlara sağlam, gümrah olmalarını arzulayıb. Bayram xonçasındakı şirnilərlə, rəngbərəng şarlarla balacaları sevindirib. Stasionar müalicə alan balacalar Bahar qızının gəlişindən çox seviniblər.

 

Rayon səhiyyə İşçiləri həmkarlar təşkilatının dəstəyi ilə xəstəxananın 200-dən çox azyaşlı övladı olan əməkdaşlarına bayram sovqatı paylanılıb.

 

Bayram tonqalı ətrafına toplaşan rayonun səhiyyə işçilərini Novruz bayramı münasibətilə xəstəxananın direktoru Şirinxanım Səmədova təbrik edib. Yurdumuza əmin-amanlıq, firavanlıq, bol ruzi-bərəkət, sağlam həyat arzu edib.

 

Novruzun əsas personajları olan Kosa və Keçəl məzəli söhbətləri ilə bayram tədbirini daha da rövnəqləndiriblər. Yumurta döyüşdürüb, rəqs edərək səhiyyə işçilərinə xoş ovqat bəxş ediblər.

 

Şöbələrin əl işlərindən ibarət xonçalar sərgilənib. “Ən gözəl bayram xonçası” müsabiqəsinin qalibləri də mükafatlandırılıb. Birliyin, həmrəyliyin təcəssümü olan Yallı ilə tonqal ətrafında halay çəkilib.