TƏBİB, Azərbaycan Minimal İnvaziv Cərrahlar Cəmiyyəti və “Almaz Akademie” Tibbi Treninq Mərkəzinin birgə təşkilatçılığı ilə Şirvan şəhərində "Minimal invaziv cərrahiyyədə son nailiyyətlər" adlı regional konfrans keçirilib.

 

Aztibb.az TƏBİB-ə istinadən xəbər verir ki, tədbirdə TƏBİB-in tabeliyində fəaliyyət göstərən tibb müəssisələrindən 70-ə yaxın mütəxəssis iştirak edib.

 

Konfransda TƏBİB-in İcraçı direktorunun müavini Araz Nəsirov, Şirvan Şəhər Mərkəzi Xəstəxanasının direktoru Pərviz Rüstəmbəyov, professor Qurbanxan Müslümov və professor İslam Mahalov minimal invaziv cərrahiyyə sahəsində son yeniliklər, müasir yanaşmalar və təcrübələr haqqında iştirakçılara geniş məlumat veriblər.

 

Konfrans çərçivəsində professor Qurbanxan Müslümov "Minimal invaziv cərrahiyyədə səhvlər və ağırlaşmalar", professor İslam Mahalov "Əməliyyatdaxili fəsadlar: Ginekoloq nəyə hazır olmalıdır?", həkim Vasif İsmayılov "Minimal invaziv cərrahiyyəyə göstəriş alqoritmləri", həkim Elnur Əkbərov "Endoskopik sinus cərrahiyyəsində ən çox rastlanan fəsadlar" mövzusunda məruzələrlə çıxış ediblər.

 

Bundan əlavə, konfrans çərçivəsində TAPP, laparoskopik kistektomiya və lazer proktoloji əməliyyatları canlı yayım vasitəsilə icra olunaraq zala transliyasiya edilib.

 

Tədbirin sonunda iştirakçılar arasında fikir mübadiləsi aparılıb, suallar cavablandırılıb və müasir minimal invaziv cərrahiyyənin inkişaf perspektivləri müzakirə olunub.

 

Qeyd edək ki, tibbi bilik və təcrübə mübadiləsinin genişlənməsinə töhfə vermək məqsədi ilə regionlarda bu cür elmi tədbirlərin gələcəkdə də davam etdirilməsi nəzərdə tutulur.