Azərbaycan Tibb Tələbələrinin təşəbbüsü və Azərbaycan Daxili Xəstəliklər Dərnəyinin təşkilatçılığı ilə Yeni Klinikada "Azərbaycan Tibb Tələbələrinin 1-ci Gineokologiya Forumu" baş tutub.

 

Universitetdən Aztibb.az-a verilən xəbərə görə, tədbirdə Yeni Klinikanın direktoru Barat Yusubov, direktor müavini, Reproduktiv sağlamlıq və ailə planlaması mərkəzinin rəhbəri Gülnar Nuriyeva, ATU-nun II Müalicə-profilaktika fakültəsinin dekanı, Anesteziologiya və reanimatologiya kafedrasının dosenti, Səhiyyə Nazirliyinin anesteziologiya və reanimatologiya üzrə eksperti İsrail Məhərrəmbəyli, ATU-nun II mamalıq və ginekologiya kafedrasının rəhbəri prof. Hicran Bağırova açılış nitqi ilə çıxış ediblər.

 

Direktor Barat Yusubov Azərbaycan tibb tələbələrinin hazırki dövrdə çox şanslı olduqlarını qeyd edərək, müasir tibb texnologiyaları və dünya təcrübəsinə olan əlçatanlığın onların professional inkişafı üçün böyük əhəmiyyət daşıdığını vurğulayıb. Barat Yusubov tibb tələbələrinin müxtəlif sahələrdə əldə etdikləri nailiyyətlərin ölkənin tibb sahəsinin inkişafına mühüm töhfələr verəcəyinə inandığını bildirib.

 

Gülnar Nuriyeva Reproduktiv sağlamlıq və ailə planlaması mərkəzi haqqında ətraflı məlumat verərək mərkəzin tərkibində fəaliyyət göstərən Mama-Ginekologiya, Uşaq xəstəlikləri və sağlamlığı, Uşaq reanimasiya və intensiv terapiya, Neonatologiya, Uşaq təcili və təxirəsalınmaz tibbi yardım şöbələrinin fəaliyyətini və Mama-ginekologiya sahəsinin tarixini əks etdirən videoçarxı nümayiş etdirib.

 

Tibb tələbələrinə ginekologiya ixtisasının gələcək perspektivlərini, müsbət və mənfi yönlərini, müxtəlif dar sahələrini göstərmək, ixtisas seçimində təcrübəli həkimlər vasitəsi ilə yardım etmək məqsədilə təşkil olunan tədbirdə Yeni Klinikanın Mama-ginekologiya şöbəsinin müdiri, cərrah mama-ginekoloq Vüsalə Əzizova, cərrah mama-ginekoloq Alik Qurbanov, professor cərrah-ginekoloq İslam Mahalov, Azərbaycan Milli Onkologiya Mərkəzinin onkoginekologiya şöbəsinin rəhbəri, PhD. Şəmistan Alıyev, cərrah mama-ginekoloq, PhD. Natiq Məhərrəmov, mama-ginekoloq Rəxşəndə Əliyeva, mama-ginekoloq Xatirə Şeyxzadə, mama-ginekoloq Türkay Şəkərova müvafiq sahə üzrə olan çıxışları təqdim ediblər.

 

350-yə yaxın qonağa ev sahibliyi edən tədbirin sonunda iştirakçılar sertifikatla təltif ediliblər.