Pirallahı Tibb Mərkəzində Elektroensefaloqrafiya (EEQ) müayinəsinin icrasına başlanılıb.

Mərkəzdən Aztibb.az-a bildirilib ki, EEQ beynin bioeletrik aktivliyini ölçməklə beyindəki patoloji prosesləri qiymətləndirən nevroloji müayinə üsuludur. Epilepsiya, Ensofalopatiya, beynin bəd və xoş xassəli şişləri, beyin iltihabı(ensefalit), insult, yuxu pozuntuları, Alzheimer xəstəliyi, neyropsixiatrik xəstəliklər və digər xəstəliklərin diaqnostikasında istifadə olunur.

Müayinə zamanı baş dərisinə yapışdırılmış elektrodların köməkliyi ilə beynin elektrik aktivliyi qeyd olunur. EEQ tam ağrısız və ziyansız müayinə növüdür. İnsanın ayıq və yuxu vəziyyətində həyata keçirilə bilir.

Qeyd edək ki, icbari tibbi sığorta ilə həyata keçirilən müayinə həkim-nevroloq Fəridə Piriyeva tərəfindən icra olunur.