Səhiyyə Nazirliyinin İctimai Səhiyyə və İslahatlar Mərkəzi (İSİM), Ailə, Qadın və Uşaq Problemləri üzrə Dövlət Komitəsinin birgə əməkdaşlığı ilə Gəncədə 53 və 335 nömrəli məktəblərdə narkomaniyanın təhlükəli təsirlərinə həsr olunmuş maarifləndirici tədbirlər keçirilib. 

Bu məlumat Aztibb.az-a İSİM-dən verilib.

İSİM-in Layihələrin əlaqələndirilməsi şöbəsinin müdir müavini, həkim Ülkər Camalova təqdimatla çıxış edərək narkomaniya ilə mübarizə mövzusunda ətraflı məlumat verib. O, iştirakçıları zərərli vərdişlərin mənfi təsirləri və təhlükəli fəsadları barədə məlumatlandırıb.

Dövlət Komitəsinin Ailə məsələləri şöbəsinin əməkdaşı Nailə İbrahimova zərərli vərdişlərlə mübarizədə maarifləndirici görüşlərin əhəmiyyətini vurğulayaraq, iştirakçıları öz sağlamlıqlarına məsuliyyətlə yanaşmağa, sağlam həyat tərzi keçirməyə çağırıb.

Yekunda iştirakçıları maraqlandıran suallar cavablandırılıb və onlara İSİM tərəfindən hazırlanaraq çap edilən maarifləndirici materiallar təqdim edilib.