Pirallahı Tibb Mərkəzinin təşkilatçılığı, TƏBİB-in və Pasiyent Təşkilatları İttifaqının dəstəyi ilə Zirə EKO parkda Beynəlxalq Nadir Xəstəliklər Gününə həsr olunmuş seminar keçirilib.

Aztibb.az-a Pirallahı Tibb Mərkəzindən verilən məlumata görə, seminarda TƏBİB-in Təlim və tədqiqatlar departamentinin rəhbəri Teymur Mirzəbəyli ölkəmizdə nadir xəstəliklərdən əziyyət çəkən xəstələrə dövlət qayğısından danışıb.

Pasiyent Təşkilatları İttifaqının sədri Ayaz Hüseynov öz çıxışında pasiyentlərin keyfiyyətli müalicəsinin təşkilindən söz açıb.

Daha sonra müxtəlif nadir xəstəliklərin müayinə, müalicə və laborator diaqnostikası haqqında ixtisaslaşmış həkimlər -Gülay Qurbanzadə, Sevil Cəlilova, Nərgiz Yəhyəzadə, Sevinc Camıyeva, Orxan Nəcəfov çıxış ediblər.

Baş tutan tədbirdə 50-dən çox tibb işçisi iştirak edib.

Sonda Pirallahı Tibb Mərkəzinin direktoru Azər Zeynalov tədbirin əhəmiyyətindən danışıb və seminar iştirakçılarına uğurlar arzu edib.