Heydər Əliyev Fondunun "Talassemiyasız həyat naminə" proqramı çərçivəsində talassemiya, hemofiliya və digər qan xəstəliklərindən əziyyət çəkənlərə yardım göstərilməsi məqsədilə Siyəzən Rayon Mərkəzi Xəstəxanasında növbəti qanvermə aksiyası keçirilib.

Xəstəxanadan Aztibb.az-a verilən xəbərə görə, aksiya Siyəzən Rayon İcra Hakimiyyəti, Siyəzən Rayon Mərkəzi Xəstəxanası və Səhiyyə Nazirliyinin Milli Hematologiya və Transfuziologiya Mərkəzinin Mərkəzi Qan Bankının birgə təşkilatçılığı ilə baş tutub.

Qanvermə aksiyasına Mərkəzi Qan Bankını təmsil edən tibb heyəti cəlb olunub. Aksiyaya qoşulan vətəndaşlar əvvəlcə Milli Hematologiya və Transfuziologiya Mərkəzinin Qan Bankının xüsusi həkim briqadası tərəfindən müayinədən keçirilib, hər bir donorun sağlamlıq imkanları müəyyənləşdirilib və daha sonra onlardan qan götürülüb.

Aksiyada Rayon İcra Hakimiyyətinin, YAP Siyəzən rayon təşkilatının, idarə, müəssisə və təşkilatların kollektivləri, rayon ictimaiyyəti və mülki vətəndaşlar iştirak ediblər.