Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyi, Azərbaycan Respublikası Elm və Təhsil Nazirliyi, Naxçıvan Dövlət Universiteti və Qərbi Azərbaycan İcmasının birgə təşkilatçılığı ilə Naxçıvanda növbəti dəfə “Qərbi Azərbaycana qayıdış” adlı festival-konqres keçirilib. 

Festival-konqres çərçivəsində Naxçıvan Dövlət Universiteti Elmi Kitabxanasında çap olunmuş dəyərli elmi əsərlərin təqdimatı baş tutub.

Tədbirdə fəxri üzv qismində iştirak edən AR ETN Botanika İnstitutunun baş direktoru professor Səyyarə İbadullayevanın müəllifi olduğu “Xalq təbabətinin unudulmuş reseptləri (Qərbi Azərbaycan, Şərqi Zəngəzur və Qarabağ icmaları yaddaşlarından)” adlı kitabının təqdimatı keçirilib.

Bu məlumat Aztibb.az-a Botanika İnstitutundan verilib.

Təqdimat mərasimini Naxçıvan Dövlət Universitetinin rektoru Elbrus İsayev açaraq qeyd edib ki, Qərbi Azərbaycan mövzusu bu gün ölkə Prezidenti, Müzəffər Ali Baş Komandan tərəfindən ziyalılar qarşısında əsas vəzifə kimi qoyulub: “Ali Baş Komandanımızın tapşırığı ilə Qarabağın işğaldan azad olunmasını, Qarabağa qayıdışı bizim müzəffər ordumuz icra edibsə, Qərbi Azərbaycana qayıdışı da alimlər ordusu, yəni bizlər qələmlə, sözlə, fikirlə, tarixlə, ədəbiyyatla təmin etməliyik. Yaxşı haldır ki, 30 il ərzində Qərbi Azərbaycan əsilli alimlərimizin bir hissəsi, hətta Qərbi Azərbaycandan olmayanlar belə Qərbi Azərbaycan mövzusunu həmişə tədqiqatlarında saxlayıblar”.

Elbrus İsayev diqqətə çatdırıb ki, bu gün işığına toplaşdığımız kitab təqdimatlarının özü də ciddi bir mesajdır.

Professor Səyyarə İbadullayeva çıxışında qeyd edib ki, “Xalq təbabətinin unudulmuş reseptləri (Qərbi Azərbaycan, Şərqi Zəngəzur və Qarabağ icmaları yaddaşlarından)” adlı kitabı “Qərbi Azərbaycana qayıdış” konsepsiyasına töhfə olaraq hazırlanıb və əsas məqsəd  “Böyük Qayıdış” icmalarına yaşadıqları bölgədə yayılan bitkiləri tanıtmaq, onların istifadə yollarını öyrətməkdir. Kitabda Qərbi Azərbaycan, Şərqi Zəngəzur və Qarabağ icmalarının yaddaşında qalan 200-dən çox bitki və bitki yığımlarının müalicəvi təsirləri, onların istifadə üsulları haqqında etnobotaniki sorğular nəticəsində toplanmış məlumatlar və bitkilərin şəkilləri əks olunub. Kitab 2023-cü ildən əhəmiyyətli mənbə kimi öz doğma el-obalarına qayıtmış icmalara təqdim olunur.  

Sonda müəllif kitabı haqqında səsləndirilən dəyərli fikirlərə görə öz təşəkkürünü bildirib və məzunu olduğu Naxçıvan Dövlət Universitetində təşkil olunan tədbiri qürurverici hadisə kimi qiymətləndirib.