Uzun müddət idi ki, sirroz xəstəliyindən əziyyət çəkən xəstə qızının bağışladığı qaraciyər ilə sağlam həyata bağlandı.
Aztibb.az xəbər verir ki, bu barədə Mərkəzi Klinikanın ümumi cərrahı, transplantoloq Tariyel Nadirov sosial şəbəkədə məlumat paylaşıb.
Məlumatda bildirilir: "Sirrozun yaratdığı problemlər həyati təhlükə yaradınca qaraciyər köçürülməsi qaçınılmaz oldu. Qaraciyər nəqli məsələsi gündəm olduğunda bütün övladları könüllü donor olmaq istədi, amma yalnız bir qızının qaraciyəri donor olmaq üçün uyğun oldu.
Əməliyyatdan 14 gün əvvəl xəstədə həyati təhlükə törədən ağırlaşmalar (hepatik ensefalopatiya evre 3, qida borusu qanaxması) yarandığı üçün təcili olaraq yaxınları tərəfindən Mərkəzi Klinika Gəncə Xəstəxanasının Reanimasiya şöbəsinə köçürüldü. Dr. Səbinə Qasımova və komandası tərəfindən xəstə stabilləşdirildikdən sonra Mərkəzi Klinikanın reanimasiya bölümünə köçürüldü. Vüqar Abdulkərimov və komandası tərəfindən xəstə əməliyyat oluna biləcək vəziyyətə gətirildikdən sonra həyati risklə əməliyyata alınaraq qızından qaraciyər köçürüldü.
Bu gün əməliyyatdan 12 gün keçir. Donor əməliyyatdan 5 gün sonra evə göndərildi, xəstəni də evə göndərməyi planlaşdırırıq".
