Ailə, Qadın və Uşaq Problemləri üzrə Dövlət Komitəsinin təşkilatçılığı və TƏBİB-in dəstəyi ilə Bərdə, Füzuli, Tərtər, Ağcabədi, Tovuz və Zaqatala qadın resurs mərkəzlərində “Erkən nikah və qohumlar arasında nikah hallarının qarşısının alınması” mövzusunda təlimlər keçirilib.
Aztibb.az TƏBİB-in feysbuk səhifəsinə istinadla xəbər verir ki, təlimlər “Uşaqlara dair Strategiyanın həyata keçirilməsi üzrə 2020-2025-ci illər üçün Fəaliyyət Planı”nın 5.3.10-cu bəndinin icrası istiqamətində əhalinin maarifləndirilməsi məqsədilə keçirilib.
Təlimlərdə TƏBİB-in həkim-eksperti Leyla Məmmədova iştirak edib.
Layihə çərçivəsində həkim-mütəxəssislər tərəfindən 560-dan çox xanım iştirakçılara reproduktiv sağlamlığın qorunması, erkən nikah, eləcə də qohumlar arasında nikahın fəsadları barədə məlumatlar verilib, qızların təhsildən yayınması hallarının qarşısının alınması ilə bağlı müzakirələr edilib.
