"Həkimlərimizi tanıyaq!" rubrikası təqdim edir: Təcrübəli pulmonoloq Əlizamin Sadıqov
17.06.2024 10:04
"Həkimlərimizi tanıyaq!" rubrikamızın qonağı bu dəfə təcrübəli pulmonoloq, professor Əlizamin Sadıqovdur.
 
O, 1983-cü ildə Azərbaycan Tibb Universitetinin Müalicə-profilaktika fakültəsini bitirib. 1991-1995-ci illərdə Sankt-Peterburq şəhərindəki Tibb Elmləri Akademiyasında pulmonologiya ixtisası üzrə aspitarantura təhsili alıb. 2000-2004-cü illərdə Sankt-Peterburq şəhərində Pavlov adına Tibb Universitetində doktorantura oxuyan Əlizamin Sadıqov dissertasiya işini uğurla müdafiə edərək tibb elmləri doktoru elmi dərəcəsini alıb.
 
Həkim 2015-2017-ci illərdə ABŞ-ın Atlantik Beynəlxalq Universitetində, 2017-2019-cu illərdə Harvard Universitetində pulmonologiya üzrə kurs keçib.
 
Əlizamin Sadıqov İngiltərədə nəşr olunan "Pulmonology and Respiratory Medicine" jurnalında redaksiya heyətinin üzvü, Amerikada nəşr olunan "Lung Health and Disease" redaksiya heyətinin üzvüdür. Amerika Döş Qəfəsi Həkimləri Kollegiyasının (2016) və ABŞ-da torakal cəmiyyətin ekspertidir (2020).
 
O, 300-dən çox elmi məqalənin və 10 monoqrafiyanın müəllifidir.
 
Fəaliyyəti dövründə bir sıra mükafatlara layiq görülüb. Belə ki, ABŞ-da Ağciyər Emfizema Fondunun "Kloud Lambert" adına mükafatı, Amerikada (2015-ci ildə) Beynəlxalq tədris mükafatını alıb.
 
1983-1986-cı illərdə Naxçıvan Muxtar Respublikasında həkim-terapevt, 1987-1991-ci illərdə Salyan Rayon Mərkəzi Xəstəxanasının Reanimatologiya və İntensiv terapiya şöbəsində, 1995-2000-ci illərdə Salyan rayon Ağciyər Xəstəlikləri Dispanserində işləyib. 2005-ci ildən Azərbaycan Tibb Universitetinin Tədris Terapevtik Klinikasının Pulmonologiya şöbəsinin müdiridir. Həmçinin 2020-ci ildən Funda Hospitalda pulmonoloq kimi fəaliyyət göstərir.
ÇOX OXUNANLAR