Naxçıvan Sağlamlıq Mərkəzində fəaliyyət göstərən həkim, ortopediya və travmatologiya uzmanı Anar Ələkbərov tərəfindən Naxçıvan şəhər sakini 68 yaşlı Zeynəb Əliyevanın qolunun bazu sümüyün orta nahiyəsindəki sınığının bərpa edilməsi əməliyatı aparılıb.

 

Bu barədə Aztibb.az-a Naxçıvan MR Səhiyyə Nazirliyindən xəbər verilib.

 

Qeyd olunub ki, bazu sümüyünə intramedulyar mil yerləşdirməklə sınıq parçaların sabitlənməsi əməliyatı aparılıb ki, bu Naxçıvan səhiyyəsində bir ilkdir. Adətən bu əməliyyatlar metal lövhə və vintlərlə həyata keçirilir.

 

Ortopediya və travmatologiya uzmanı Anar Ələkbərov muxtar respublikada ilk dəfə olaraq sümük içinə xüsusi mil yerləşdirməklə sümüyü xaricindən yox daxilindən sabitləyərək sınıq parçaları öz yerinə yerləşdirib.

 

Bu üsul xəstənin əməliyyatdan dərhal sonra sınıq qolunu tam istifadə etməsinə imkan verib. Bu əməliyat qaydası dünyada hazırda ən müasir qəbul edilən cərrahiyə üsuludur.

 

Xəstə bir günlük stasionar yatışdan sonra evə buraxılıb. Vəziyyəti qənaətbəxşdir.